Најпопуларните автомобили во СФРЈ (I дел)
СФР Југославија претставуваше своевиден спој на културите на Истокот и Западот, што се огледуваше во повеќе сегменти на друштвениот живот. Со тој атрибут можеше да се пофали и југословенскиот автомобилски пазар – имавме прилика да поседуваме збирка на разновидни модели од многу произведувачи, но секако, највеќе се купуваа возила од домашното производство. Меѓутоа, ни автомобилите од другите европски држави не беа ретки на нашите патишта. Палетата на производителите ги опфаќаше земјите како што се Франција, Италија, Источна и Западна Германија, Чехословачка, СССР итн. Поедини странски типови на автомобили беа дури и произведувани кај нас, што беше резултат на одлична стопанска соработка помеѓу Југославија и некои од наброените земји. Тоа беше случај со големиот италијански произведувач „Фиат“, кој соработуваше со „Црвена Застава“ од Крагуевац, францускиот „Рено“, кој имаше монтирано погони во фабриката IMV, во Ново Место или германскиот „Фолксваген“, чие производство беше сместено во фабриката TAS во Сараево.
Ќе ве подсетиме на најпопуларните модели од тоа време, а некои од нив можеме и денес да ги видиме на патиштата. Меѓу оние луѓе кои сеуште ги поседуваат овие, за денешни прилики можеби малку необични автомобили, се вистински вљубеници во олдтајмери, ентузијасти кои љубоморно ги чуваат своите железни миленици, редовно ги сервисираат и ги чуваат од забот на времето. Но, за жал, многу поголем е бројот на оние сопственици, кои заради финансиска неможност да купат некој од поновите модели, секојдневно ги користат овие возила, што е реална последица на суровата економска ситуација во која живееме.
Еден од најпопуларните автомобили во големата држава беше Zastava 750, нагалено наречен „Фиќо“. Производството започнало во 1962 година, во погоните на „Црвена Застава“, а првата верзија беше блиска копија на „Фиат 600“, со карактеристични врати кои се отвараа од напред. Цели генерации растеа со овој автомобил и многу возачи ги имаа своите први искуства и часови на возење, токму со овој легендарен југословенски мини. Производството траеше се до 1986 година. Во стандардната верзија развиваше 25кс, што беше доволно за најголема брзина од 110км/ч.
Покрај „Фиќото“, „Црвена Застава“ произведуваше и поголеми модели, како што беа „Застава 101“ – популарниот „Стојадин“, „Застава 1300“ – тристач, автомобил кој масовно беше испорачуван на милициските сили и воените пошти, за да, од 1981 година, „Застава“ започне производство на возила со името „Југо“, со моделите 45, 55 и 65, номенклатура која означуваше верзија и коњски сили на моторот, истовремено.
За овој популарен автомобил беше склопен ветувачки договор за извоз во САД, но голем успех на тој аранжман изостана и покрај поволните цени.
Автомобили кои ја облежаа една епоха и на кои со радост се сеќаваме.
http://www.visokioktani.mk/?p=5330
