Загинаа четворица во сообраќајка близу Кичево .Татко, бебе и тригодишно дете жртви во сообраќајката кај Колари.
Татко и неговите две малолетни ќерки од кичевското село Зајас и сопатник од скопското село Свиларе загинаа во тешката сообраќајка што се случи во четвртокот попладне околу 18 часот на магистралниот пат Кичево-Гостивар во близина на селото Колари.
Мајката на децата и возачот на другиот автомобил со тешки повреди се пренесени во Ургентниот центар во Скопје.
Во сообраќајката на лице место починале бебето и тригодишното дете, додека нивниот татко, 26-годишниот Деар А. починал доцна синоќа на пат од болницата „Свети Еразмо“ во Охрид кон Ургентниот центар во Скопје.
Сопатникот од другото возило, 46-годишниот Амзи И. од Скопје починал во кичевската болница.
26-годишната мајка и 31-годишниот возач на еден од автомобилите се во Ургентниот центар.
Во тешката сообраќајна незгода учествувале автомобил „волво“ со кичевски регистарски ознаки, управуван од Деар А. што по магистралниот пат се движел од Гостивар кон Кичево и товарно (пикап) возило марка „форд-конект“ со скопски регистарски ознаки, управувано од сега тешко повредениот В.А., коешто се движело во спротивна насока.
На критичното место, поточно на влезот кај селото Колари, на левата сообраќајна лента од коловозот во правецот од Гостивар кон Кичево се случил судар со предните делови од двете возила.
На лице место извршен е увид во присуство на јавен обвинител како и полициски екипи од полициската станица во Кичево.
По наредба на јавниот обвинител, во текот на денов врз телата на сега починатите лица ќе биде извршена обдукција како и вештачење врз патничките моторни возила.
За време на увидот, сообраќајот на магистралниот пат се одвиваше со наизменично пропуштање на патничките и други моторни возила.
Полициската станица за безбедност во патниот сообраќај од Кичево презема дополнителни мерки за утврдување на причините за тешката сообраќајна незгода.
