Поради хакерски упад поништена аукцијата за нови возила на МВР
Kако најповолен понудувач беше избрана фирмата „Ка-Дис“, односно возилата „сеат алтеа фритрек“
Електронската аукција за тендерот за набавка на полициски возила била хакирана поради што ќе се одржи нова, информираа од Бирото за јавни набавки. По барање на Бирото, а по пријавен технички проблем, од компанијата во чии простории се хостира опремата на Електронскиот систем за јавни набавки е констатирано дека е откриен ДДОС напад до друга апликација која се хостира кај истиот сервис провајдер.
Поради заедничките ресурси што ги делат одредени колокациски сервери во истиот податочен центар овој напад резултирал со загуба на пакети и намалена достапност на повеќе сервиси меѓу кои и сервисот на ЕСЈН во периодот од 12:15 до 13:20 часот. Со тоа понудувачите биле оневозможени да поднесат нови намалени цени во текот на последните минути од аукцијата.
- Имајќи го во предвид утврдениот технички проблем, согласно Правилникот за начинот на користење на електронскиот систем за јавни набавки на договорниот орган, Министерство за внатрешни работи, ќе им се овозможи повторување на конкретната електронска аукција- информираа од Бирото.
Компанијата „Порше Македонија“ беше единствената компанија која се жалеше на тендерот за набавка на 150 полициски возила, на кој како најповолен понудувач е избрана фирмата „Ка-Дис“, односно возилата „сеат алтеа фритрек“.
http://dnevnik.com.mk/default.asp?ItemID=2C0C548057509A49A0A9D5F8C96268F2
