Драги клабери, нијанса подраги клаберки (ако постоите) и мали клаберчиња - Карклуб денес наполни четири години! Четири години заедница, четири години дружење, собири, коли, расправање, карање, соработка, другарство и пријателство! Четири години сме тука, планираме да бидеме тука уште долго и да продолжиме на Македонската интернет-жабокречина да бидеме светлата точка која ги поместува сите граници и ги надминува сите очекувања.
CARclub прерасна во прекрасен медиум со одлична заедница. Имаме ups & downs ама во целост сме позитивна и весела заедница која успеа да ги надмине проблемите и да биде пример за одлична соработка и помош во секој момент кога е потребно. Заедно со остатокот од тимот изградивме одличен и почитуван медиум кој има што да каже и да покаже. Пријателствата ги надминаа тастатурите и продолжија и надвор од форумот, а на тоа особено многу се гордеам.
Неизмерно сум благодарен на сите кои на овој или оној начин помогнале. Симо, Банзаи и Велештрумф, Фиц и Дејвокер, вашата помош и поддршка ми значи многу. Дени, благодарам за одличните фотографии и подготвеноста да правиме чуда и глупости за да бидеме подобри од другите! Дечки, немам доволно зборови да ви се заблагодарам!
Во изминативе четири години имаме 2790 регистрирани членови, 5000 теми и 570.000 пораки (имаше повеќе, ама чистевме малку). До сега објавивме 2380 стории на сајтот од кои 74 се тестови и имаме малку над 10.000 следачи на Facebook. Организиравме едно чудо собири, возења и прослави, се радувавме на неколку свадби и грст мали клаберчиња!
Одиме понатаму,
се гледаме на журче во петок!
