Истражувањето на ВЕЧЕР открива шокантни податоци. Иако сме мал град и иако сме божем сиромашна држава, со помалку возила од богатите европски градови, во Скопје годишно се случуваат над 2.000 судири на моторни возила или секој месец по 160 судири само во Скопје! Тоа е она што е евидентирано со забележителни материјални штети, повреди или смртни случаи. Другото не се ни брои
Во тие сообраќајки, просечно, во Скопје на самото место гинат меѓу 55 и 60 луѓе годишно. Тоа е речиси еднакво на бројот на загинати полицајци и војници во војната од 2001 година, и тоа на територијата на цела Македонија. Инаку, на подрачјето на цела држава годишно само од сообраќајки и тоа на лице место или непосредно потоа животот го губат од 180 до 200 лица.
За Македонија, особено за Скопје, возачите се поопасни од терористите.
Ако се земе предвид дека во Скопје се евидентираат само сообраќајки сторени во градски услови, каде што сепак се вози побавно и сообраќајот е главно регулиран со семафори и сообраќајни знаци, бројката од 60 жртви секој месец е нешто што се граничи со манијакалност. Кога полицијата се обидува да воведе посторог критерум кон возачи кои возат премногу брзо, особено оние кои поминуваат на црвено и возат пијани, како по договор низ Скопје се создава отпор кон полицијата, и нема разбирање за полициската строгост. А тоа е опасна навика.
Полицијата имаше силна медиумска кампања за поттикнување на свеста на возачите да се постави ред во сообраќајот и бројките се намалија: од 6254 сообраќајки во 2009 година, веќе во наредната 2010 бројката падна на 4.485. Од 2157 потешко повредени лица во сообраќајки низ Скопје во 2009 година, во 2010 бројот се спушти на 1934.
Во сообраќајките е направена материјална штета од безмалку 2 милиони евра!
Можеби вие возите умерено и се придржувате кон прописите, но вашите блиски се или пешаци или возат велосипеди... нема да настрадаат од вас или сличните на вас, туку од некој од манијаците кои мислат дека се им е дозволено, или не се подготвени својот провинциско-рурален менталитет да го прилагодат на голем град. Да покажат дека не почитуваат ниту една сила, освен силата на своите потреби и манијачења.
Во анализата на сообраќајките од оваа година само во првите 4 месеци од годинава во Скопје има 516 повредени пешаци (од кои 134 деца), плус 913 повредени сопатници! Ако се знае дека во истите сообраќајки се повредени 864 возачи, тогаш е шокатно дека совозачите, ни криви ни должни, настрадале најмногу во скопските сообраќајки, а единствената вина им е што седеле во исто време и на исто место со манијаците и нивните жртви од другата страна на сообраќајката.
Од вкупниот број загинати во сообраќајките годинава, само за 4 месци, загинале дури 12 совозачи!
Патем, возачите гинеле помалку, 11 лица. Ако се земе дека возач има секогаш, а совозач во возило кое имало судир некогаш има, а некогаш нема, убедливо најчести жртви на сообраќајките низ Скопје се совозачите и пешаците. Имено, и кај пешаците бројот на загинати е еднаков на тој на совозачите, а од нив годинава загинале 12 лица.
При ова потешко се повредени 27 возачи на мотори и мопеди, плус 72 возачи на велисипеди. Загинале двајца на велосипед и тројца на мотор.
Манијачка слика, нема што. И тука нема невини и наивни. Нема дека некој друг е виновен. Или, дека јас и кога сум пешак, и кога возам сум пристоен, ама другите се за никаде. Нека се преиспита секој колку пати, само оваа недела, не преминал улица на пешачки премин, паркирал на недозволено место кое, многу често, создава проблеми за движење на пешаците или им го затвора видикот на возачите. Сетете се колку пати сте возеле низ град побрзо од 80 километри на час, колку пати сте се залетале на последната секунда на семафор, а често и секунда потоа... најпосле, и да сте невини како од мајка родени. Колку пати сте му префрлиле на некој што се однесува манијачки во сообраќајот, и за ваше и за негово добро. Да не заборавиме, годинава најголем број од загинатите во сообраќајките не се возачите, туку тие до нив, сопатници во возилата.
Во графиката која ја следи темата на денот, ќе видите кои се црните точки во Скопје, податоци за манијаците кои се движат низ главниот град и нивните жртви.
извор:
http://www.vecer.com.mk/default.asp?ItemID=B05F6A43A0A380468DD39ECAE31EC98D
