Случајот со Volkswagen ја разоткрива практиката во целата бранша
Манипулации околу вредностите на штетите материи во издувните гасови вршат сите производители. Преку Volkswagen, овој проблем конечно го добива неопходниот публицитет, по што мора да следат промени во целата индустрија и политиката што ја штити истата.
Во екот на одржувањето на салонот на автомобили во Франкфурт избива скандалот околу манипулациите со издувните гасови кај возилата со дизел мотор на концернот Volkswagen на американскиот пазар. Но, познавачите на браншата воопшто не се изненадени. Во целата автомобилска индустрија веќе со години се практикуваат овие манипулации со издувните гасови. Единствената разлика е во тоа што место со обични прекинувачи, денес производителите ги лажираат вредностите на издувните гасови преку примена на комплексни електронски системи.
Отстапувањата меѓу реалните и лажираните вредности се фрапантни. Според мерењата што независна институција ги изврши на 15 модели од различни производители со дизел мотор, реалните вредости во просек се седумпати поголеми од вредностите што се пријавуваат пред властите. Производителите ја применуваат оваа практика со цел да го избегнат вградувањето на дополнителна техника колку е можно подолго.
Прекумерната концентрација на азотни оксиди влијае врз здравјето и животната средина
Проблемот е во тоа што директно ѝ се наштетува на животната средина. Станува збор за штетните азотни оксиди во издувните гасови, кои заедно со јаглеводородите влијаат врз озонската обвивка и придонесуваат за зголемување на концентрацијата на неразградливи честички во атмосферскиот воздух. Дополнително се зголемува киселоста на почвата и на морињата. Сето тоа ги загрижува еколозите. Возилата не се единствен, но во секој случај се значаен извор на овие штетни материи.
Секако дека прекумерната концентрација на азотни оксиди влијае и врз човечкото здравје, поради што се воведуваат гранични вредности за концентрацијата на азотни оксиди. Загадениот воздух предизвикува иритација и оштетувања на дишните патишта, а астматичарите се особено загрозени.
Емисијата на штетни гасови при секојдневната експлоатација на возилата се разликува драстично од вредностите што се добиваат при хомологациските мерења. Овие мерења се спроведуваат под точно одредени услови, почнувајќи од температурата, па сé до циклусот на возење. Производителите можат прецизно да ја модулираат контролната електроника на моторот според овие услови, односно електрониката самостојно препознава кога возилото е приклучено на мерење на издувните гасови и активира посебен режим на работа на моторот. Во овој режим се користи драстично намалена моќност на моторот, затоа што пропишаниот циклус на возење предвидува само умерени забрзувања и брзини. Соодветно на тоа се добиваат и вредности што се неколкупати пониски од реалните.
Техниката за пречистување постои, производителите не сакаат да ги мачат возачите
Браншата веќе располага со техника со која што може да се постигне реалната емисија на штетни гасови да биде во границите на дозволеното и на пазарот веќе со години се нудат модели што ги исполнуваат граничните норми. За таа цел се користат акумулациски катализатори или таканаречени SCR-катализатори, кои работат со раствор од уреа. Но, повеќето производители сакаат да ги „поштедат“ своите клиенти од неопходноста во редовни временски растојанија да се дополнува специјалната течност во возилото.
Тоа е банална причина, затоа што овој начин на пречистување на издувните гасови ниту ги поскапува возилата, ниту пак ги прави помалку економични или помалку моќни. Потребно е само незначително да се модифицира издувниот систем за проблемот да се реши. Во основа, потребно е да се зголеми температурата на издувните гасови и да се вшприца уреа. Тоа не доведува до осетно поскапување на возилата.
Volkswagen е само жртвено јагне. Проблемот сигурно не избива случајно во екот на одржувањето на салонот во Франкфурт, а уште помалку е случајно тоа што надзорниот одбор на концернот веќе во петок одржува редовна седница на која што ќе се решава дали шефот Мартин Винтеркорн ќе ја задржи водечката позиција во автомобилскиот гигант. Пред само неколку месеци, патријархот на Volkswagen и внук на Фердинанд Порше, 78-годишниот Фердинанд Пих, го доведе најголемиот европски производител на автомобили во неколкунеделна криза, кому не му се допаѓа Винтеркорн да го води концернот. Значи, ништо не е случајно.Во петок се одржува редовна седница на надзорниот одбор на Volkswagen. Скандалот случајно избива сега?
Концернот од Волфсбург не е единствен што го има проблемот со прекумерната количина на азотни оксиди во издувните гасови. Постојат евидентирани податоци дека сите производители вршат манипулации при законското мерење на емисијата – некои повеќе, некои помалку. Дизел моторите не се проблемот. Модерните бензински мотори со директно впрскување на горивото го имаат истиот проблем, ако не и повеќе. Покрај азотните оксиди, кај нив произлегува и значително повисока емисија на неразградливи честички од дозволените вредности. Според тоа, мерењата на бензинците се манипулираат исто како дизелите.
Скандалот избива во САД, но тоа воопшто не ја поштедува Европа. Проблемот е во тоа што европските институции ги затвораат очите и не проверуваат колкава разлика се јавува меѓу реалните и манипулираните вредности. Токму поради таа причина, ЕУ подготвува воведување на ново тестирање на издувните гасови во услови на реално возење. Преговорите меѓу политиката и индустријата траат веќе со години и постојано се пролонгираат првенствено поради некооперативноста на производителите на автомобили. Пролетоска се постигна спогодба околу постапката, но сé уште не е решено околу таканаречениот фактор на конформитет, односно околу дозволениот степен на отстапување меѓу реалните и лабораториски измерените вредности. Поинаку кажано, индустријата притиска властите да ѝ дозволат техниката во возилата и натаму да биде надвор од нормите, се преговара единствено околу тоа колкаво треба да биде отстапувањето. Но, зарем е ново тоа што индустријата е милениче на политикатa.
http://automedia.mk/?p=19031Ме мрзи да копирам веќе..следете си аутомедиа.мк.. очигледно се доста информирани околу случајов.
