Помал, подинамичен, поградски – Peugeot 208!
Peugeot официјално го претстави новиот 208. Накратко: помал е од претходникот (!), многу, многу, многу полесен и позабавен и подинамичен за возење!...
Новиот модел ќе го задржи меѓуоскиното растојание на претходникот (2.540 mm), но затоа ќе биде пократок за цели 70 mm (3.960 mm) и понизок за 10 mm (1.492 mm). И покрај тоа, Peugeot ветува дека е зголемен просторот во внатрешноста, а и багажникот брои 15 литри повеќе (285 литри). Намалените надворешни димензии, пак, ќе го направат 208 повторно градски автомобил, со многу подобри маневарски способности и полесно паркирање низ тесните паркинзи.
Сепак, главен адут на новиот 208 е ниската маса – стартниот модел тежи само 975 kg, што е фантастични 173 kg помалку од „дебелата“ 207-ка. Во превод, ова ќе придонесе за драстично подобрени возни својства и перформанси, како и за пониската потрошувачка. Всушност, Peugeot оди дотаму што го спомнува и легендарниот 205 GTi кога е забавата во возењето во прашање!
Покрај липосукцијата, 208 ќе добие и целосно нови, помали, но посилни бензински мотори, со зафатнина од 1.0 и 1.2 литри и со сила од 75 односно 100 КС. Послабиот бензинец ќе биде вистински шампион за ниска потрошувачка – ќе троши само 4,3 литри во просек, а ќе испушта извонредно ниски 99 g/km CO2 во атмосферата.
Ќе бидат понудени и пет HDI дизели со micro-hybrid технологијата со Stop&Start и сила од 70 до 140 КС, кои ќе бидат убедливо најштедливи и најчисти во својата класа. На пример, најслабиот дизел ќе троши само 3,4 литри на 100 km во просек, односно ќе има емисија на CO2 од само 87 g/km.
Промените во димензиите, придонесоа и за многу подинамичен дизајн, кој сега го следи јазикот кој го наметна поголемиот 508. Во споредба со 207, новата 208-ка дефинитивно изгледа помодерно, подинамично и поспортски, со изглед кој е повеќе унисекс (207-ката беше омилена пред се кај понежниот пол).
И внатрешноста е целосно променета, со малку некарактеристично високо поставена инструмент табла и централна конзола која е поблизу на дофат на рацете – многу поразиграно и повесело во однос на 207-ката, впрочем и каков што треба да биде еден мал автомобил. Peugeot ветува и голем напредок во квалитетот на материјалите и изработката, а на фотографиите видливо е големото внимание посветено на деталите, како кај 508, што е вистинска реткост во класата.
Peugeot 208 треба да пристигне на пазарот на пролет наредната година, кога ќе бидат познати и цените и нивоата на опрема.
Преземено од:
http://koli.com.mk/novosti_vnatresna.aspx?id=2092
