Луѓето кои возеа мини автомобили тоа го правеа заради забава. Денес, дури и луѓето кои се навикнати да возат луксузни седани, посегнуваат по ваков тип возило, коментира Такеши Мијо, автомобилски аналитичар во Carnorama Japan.
На годинашниов автомобилски салон во Токио, Honda го претставува двосед кабриолетот S660 - првиот компактен спортски модел на компанијата од 1996 година. Во истата класа Daihatsu има модел чии надворешни панели можат да се менуваат и персонализираат, како футрола на smartphone. Suzuki има дури три концепти на варијација на тема. Повеќе од една третина од официјалните 157 премиери на салонот се на мали автомобили.
Јапонските производители вложуваат многу во суперкомпактниот сегмент, за да привлечат нови клиенти кои сакаат нешто повеќе од мал и практичен автомобил. Според статистиката ова е трета најуспешна класа во домашната автомобилска индустрија. Во Јапонија таквите автомобили дури имаат посебно име - Kei Car, што во превод значи „патничко возило“. Класата се разликува со жолти регистарски таблички и „се роди“ од потребата за евтин превоз за време на индустријализацијата на Јапонија по Втората светска војна. Типичните јапонски мини автомобили имаат тесна внатрешност, а моторот под хаубата нема повеќе од 660 кубни сантиметри работна зафатнина. Околу две третини од овие автомобили се возат од жени, а остатокот од луѓе над 60 години, потврдува истражувањето на Јапонската асоцијација за мини автомобили.
Но, работите се менуваат. За првите десет месеци од годината 39% од продадените во Јапонија автомобили се од мини сегментот. Во оваа година продажбата на Kei автомобили во Јапонија се зголемиле за 3,4% во однос на лани, покажуваат податоците на јапонската асоцијација на автомобилски производители. Единствената пречка што може да предизвика понатамошно проширување на сегментот е новата државна политика за зголемување на даноците од следната година, покрената од премиерот на Јапонија, Шинзо Абе. Во моментов сопствениците на ваквите модели плаќаат околу 70 долари годишен данок. За споредба, цената кај поголемите автомобили во земјата се движи од 290 до 1.100 долари. Специјалисти сметаат дека секое зголемување на данокот би им бил дополнителен „товар“ на значително сиромашните семејства, како и малиот бизнис, во провинциските области каде Kei автомобилите се основниот транспорт.
LosiPatista
