Македонија сака да гради тркачка патека
Автомобилистичката федерација на Македонија, АМСМ и Светската автомобилистичка федерација (ФИА) денеска потпишаа меморандум за членство на нашата земја во кампањата „Акција за безбедност на патиштата 2011-2020“. Претседателот на ФИА, Жан Тод, изрази големо задоволство што Македонија е вклучена во оваа кампања за подобрување на безбедноста во сообраќајот.
„Задоволен сум што Македонија ги презема сите потребни мерки за подобрување на безбедноста во сообраќајот и од тоа што во рамките на Министерството за внатрешни работи имате посебен оддел за подобрување на безбедноста во сообраќајот. Во светот, секоја година 1,3 милиони лица го губат животот во сообраќајни несреќи. Ако се продолжи со вакво темпо, до 2020 година оваа бројка ќе се зголеми на два милиона. Мора да се инвестира во патната инфраструктура и да се посвети големо внимание на едукацијата на возачите. Се надевам дека оваа кампања во Македонија ќе донесе резултати“, рече поранешниот прв човек на Формула 1 тимот Ферари.
Министерката за внатрешни работи, Гордана Јанкуловска, истакна дека за оваа кампања на располагање ќе го стави целиот персонал со цел да се подобри состојбата во сообраќајот. Спасе Јовковски, претседателот на АМСМ, објасни дека во Македонија има осум жртви на 100.000 жители во сообраќајни несреќи. „Ние сакаме оваа бројка да се намали на пет жртви, но ќе мораме да преземеме неколку мерки и затоа пристапуваме кон оваа сериозна и важна акција на ФИА“, рече Јовковски.
„Поднесовме иницијатива до Владата на Република Македонија за градење на тркачка патека“, изјави Златко Калеников, претседателот на Сојузот на стопански комори на РМ и член на управниот одбор на Автомобилистичката федерација на Македонија. Калеников го акцентираше спортот како голем фактор, што може да влијае во подобрување на безбедноста во сообраќајот. „Доколку љубителите на тркањето имаат арена каде што ќе можат да ги покажат своите возачки квалитети, не би се тркале на улиците и патиштата низ Македонија. Оваа тркачка патека би играла многу важна улога и во едуцирањето на возачите и младите спортисти, кои сакаат да се занимаваат со овој спорт“, заврши Калеников. Претседателот на ФИА, Жан Тод, ја искористи посетата и на нашиот најдобар автомобилист Крсте Трајковски да му ја додели наградата „Дијамантска кацига“, која ја добива секој возач кој направил три хет-трика во освојувањето на шампионската титула во тркачките натпреварувања.
