Во населбата Аеродром во декември лани и во јануари годинава биле пријавени над 20 кражби на автомобили. Разговаравме со некои жртви на автомобилската мафија. Велат дека кражбите се случуваат со години, а никој ништо не презема за да ги пронајде возилата. Некои од кражбите се снимени на камерите што се поставени на локалните дуќани, но засега крадците се на слобода
Автомобилот попладнето беше паркиран на паркингот пред зграда, а утредента го немаше. Пријавив во полиција, беше направен записник и толку. Ова не е првпат од овој паркинг да се крадат возила. Слушнав дека за еден месец украле околу триесетина автомобили. Ова за „Дневник“ го изјави жител од скопската населба Аеродром каде што во последно време масовно се крадат автомобили буквално пред очите на граѓаните.
Интересно е што цел на крадците не се луксузни автомобили, туку возила произведени во 80-тите и во 90-тите години на минатиот век кои не вредат повеќе од 2.000 до 3.000 евра.
Со сајла ги влечат украдените возила
- Вообичаено, во најголем број случаи станува збор за постари модели на автомобили, како што се возилата на „застава“, „голф“, „сузуки“ и „лада“ - велат во СВР Скопје.
Во населбата Аеродром во декември лани и во јануари годинава биле пријавени над 20 кражби на автомобили. Разговаравме со некои жртви на автомобилската мафија. Велат дека кражбите се случуваат со години, а никој ништо не презема за да ги пронајде возилата.
- Од сите автомобили што разбрав дека изминативе неколку години биле украдени од овој паркинг, слушнав дека е најдено и вратено само возилото на едно полициско лице, додека од другите нема ни трага ни глас. За жал, немаме сите врски во полиција – вели еден од 30-ината оштетени сопственици на украден автомобил.
Разговаравме и граѓанин кому пред три години му бил украден автомобил на истиот паркинг. Kражбата е снимена на видеокамера од локална продавница. На снимката се гледало како бело „цитроен саксо“ со сајла го влече украденото возило.
Таа снимка ја виделе и во полиција, но ни тоа возило не е најдено. Низ најголемиот дел од раскрсниците во Аеродром има камери, но ни тие не се од голема корист кога се во прашање украдените автомобили. Сопственикот раскажува што видел на снимката од камерата.
- Возилото го паркирав во 4.30 часот наутро, а веќе во 7 часот го немаше. На видеоснимката се гледа како околу 5.30 часот со друг автомобил го влечат украденото возило, кое никогаш повеќе не го видов. Решив сам да го барам, прашував по луѓе, но сите креваа раменици. Само еден чувар го видел возилото како го влечат, но и тој не знаеше да каже во точно кој правец заминале крадците. Полицијата не беше од голема корист во мојот случај – вели жител на скопската населба Аеродром.
Луксузните возила ги краде автомафија
Според портпаролот на СВР Скопје, Лиза Бендевска, полицијата засега нема сознанија дали кражбите се извршени од одредена специјализирана група.
- Kога станува збор за кражба на постари модели на возила, каков што беше случајот и во населбата Аеродром, практиката покажува дека станува збор за сторители поединци. Kражбите на луксузни возила, пак, се извршувани од групи специјализирани за овој тип кражби - вели Бендевска.
Автомобилите во Македонија не ретко ги крадат малолетници кои откако ќе се повозат, ги оставаат. Во некои случаи возилата се крадат за продажба на делови, други се пренесуваат преку државата со фалсификување броеви на шасијата. Има информации дека автомобилите „лада“ ги крадат дрвокрадци со кои потоа пренесуваат дрва по планините. На тој начин тие не се во загуба кога ќе бидат фатени од Шумската полиција, која најчесто им ги запленува возилата.
Паралелно со порастот на кражбите на возила расте и бројот на кражби во возила - претежно чанти, цеде-плеери и други вредни предмети.
Kрадците во тие случаи оперираат на прометни паркинг-места, пред болници и институции. Будно следат кога сопственикот ќе го остави возилото на паркинг-просторот и веднаш реагираат. Најчесто кршат едно од задните стакла на автомобилот, ја земаат чантата или со алат го вадат цеде-плеерот и за само неколку минути бегаат, но не далеку од местото.
Според полицијата, ваквите кражби вообичаено ги извршуваат зависници од дроги, кои провалуваат во возилата за да украдат предмети или делови за да ги продадат многу поевтино од пазарната цена.
Интерпол има податоци за 7,1 милиони украдени возила
Според Интерпол, во 2011 година биле украдени 42.000 моторни возила во светот, со што вкупната бројка на возила за кои има податоци порасна на 7,1 милиони. Оваа институција предупредува дека кражбата на автомобили е организирана криминална активност која е поврзана и со терористичките организации.
- Возилата се шверцуваат за да се финансираат други облици на криминал. Украдените возила се користат и како автомобили-бомби или, пак, се употребуваат за вршење друг криминал - велат од Интерпол.
Во декември украдени 34 автомобили во Скопје
Според СВР Скопје, лани во главниот град биле украдени 130 моторни возила, а полицијата успеала да пронајде 36 од украдените автомобили. Најголем број од кражбите се случиле во декември, кога биле украдени 34 возила.
- Во декември беа украдени 34 возила, од кои 22 во населбата Аеродром. Полицијата успеала да пронајде осум автомобили, а се работи на откривање на сторителите - изјави портпаролот на СВР Скопје, Лиза Бендевска.
http://dnevnik.mk/?ItemID=788686FA7C61AD4BA461F4FAA3B4D70F
