За еден месец од Аеродром исчезнале 35 автомобили
Крадците во последниов месец од паркинзите во оваа скопска населба украле 35 автомобили од различни марки, а најмногу се украдени „лади“, „југовци“ и „застави“. До минатата недела само три од украдените возила се пронајдени на паркинг во друг дел на Скопје и им се вратени на сопственицитеТриесет и пет автомобили се украдени во Аеродром за нецели триесет дена, меѓу 28 декември и 23 јануари. Осум „лади“, седум „југовци“, пет „застава 101“, четири „голфа“, три „сузуки марути“, две „фиќа“, едно „тико“, едно „пежо“ и еден „опел“. Само три од украдените возила се пронајдени на паркинг во друг дел на Скопје и им се вратени на сопствениците. Крадците, според информациите, главно оперираат во населбата Острово зад „Скопјанка“, на паркингот кај трите воени кули во стар Аеродром, во Мичурин, на булеварот Јане Сандански, меѓу спортската сала и некогаш последната постојка на „3“ и кај „Веро“.
Полицијата засега нема многу информации за можните сторители и за тоа каде се носат колите. Од СВР Скопје велат оти работеле на случајот.
- Имав „југо“ купено пред десетина години. Кога утрината, ден пред Водици, појдов да пријавам во полициската станица во Аеродром дека ми го нема, не бев единствениот што чекаше за тоа. Пред мене имаше уште двајца. На едниот му украле „голф“, на другиот „лада“. Пријавив, и толку. Оттогаш официјално никој за ништо не ме известил. Ниту дали е најдено „југото“ ниту дали нешто се презема - вели Зоран, чиј автомобил исчезна од паркинг во Мичурин.
Незадоволен од полициската постапка е и Марјан, кому „заставата“, стара петнаесетина години, му ја украле исто така во Аеродром, од паркинг кај „Веро“, во првите денови од новата година.
- Во полицијата во една пригода пријателски ми кажаа дека не треба да очекувам чудо, оти возилото било старо и не било интересно за некој да троши време на него. Ми кажаа дека постоеле изгледи да биде возено и да биде оставено некаде, на некој паркинг во Скопје. Но тоа било само едната можност. Другата, што воопшто не ме израдува, била таа „заставата“ да биде исечена на делови за да се искористи нешто од неа, а другото да биде продадено во отпад како старо железо. Никој не се јавува. Затоа, вртам со пријатели низ Скопје и си ја барам колата - напоменува Марјан.
Од СВР Скопје потврдуваат дека на подрачјето на ПС Аеродром има извесна зголеменост на кражбите на автомобили.
- Според евиденцијата, украдени се 22 автомобили од постар тип, а пронајдени се осум. Пет се најдени пред неколку дена. Полицијата работи на откривање на сторителите, се прибираат сознанија и се вршат проверки - вели Лиза Бендевска, портпаролката на СВР Скопје.
Во 2009 година во Македонија се украдени 608, а во 2010-та вкупно 538 возила. Статистиките за ланската година сé уште се подготвуваат.
Според одделни информации, во Аеродром најверојатно дејствува тричлена група. Еден од групата го обележува возилото, а потоа настапуваат оперативците. Тие секогаш се во пар. Додека едниот отклучува, другиот чува стража и по потреба помага. Изверзирани за одземање возила и не им треба повеќе од десетина секунди за да го придвижат автомобилот. Го вклучуваат и си заминуваат.
http://novamakedonija.com.mk/NewsDetal.asp?vest=1271285036&id=12&prilog=0&setIzdanie=22490
