За потребите на едно неодамнешно патување изнајмив Opel Mokka Х (Фејслифт) 1.4 Turbo со автоматски менувач.
Менувачот беше “од оние убавите” со двојна спојка и искрено незнам кое му е комерцијаното маркетинг име кај Опел.
Возилото го користев 6 дена и имав прилика да го експлоатирам во речиси сите типови на сообраќајни услови.
Доколку би можел да го го сумирам целокупното искуство во еден збор тоа ќе биде: Разочарување.
Зашто?
Моторот на хартија има 150 коњски сили добиени со турбо полнач. Во реалност тие коњски сили ги нема никаде.
Менувачот е многу лошо програмиран, степените за пренос ги менува со огромно задоцнување откако ќе се притисне педалата за гас.
Самото менување на степените на пренос е брзо, како што се очекува од менувач со двојна спојка, но логиката што ЕКУ-то ја има во себе е тотално лошо поставена.
При крузање со 100км/ч на автопат поставени на темпомат и обид да престигнам возило пред мене, ја притискам педалата за гас до подот.
Поминуваат 2 секунди пред менувачот да врати 2 степени подолу (екстремно споро според мене) и потоа следува гласно “БУУУУУУУУ” од моторот што не е проследено со никаков торк или забрзување, се додека вртежите не се качат над 4500. Потоа следи забрзувањето и тоа трае мноооогу долго.
Мое лично мислење е дека вртежите на моторот надвор од подрачјето на турбо полначот не се проследени со никаква моќ на погонските тркала. Има бука како кај секој атмосферски мотор од 1.4 литири и речиси идентично однесување. Тромаво до бескрај.
Ми се чини дека Опел не се потрудиле ама воопшто околу пресметката на моторот и преносниот систем. Едноставно му шибнале турбо на 1.4 атмосферец и го пуштиле моторот во продажба.
Имам возено многу возила со турбо бензински мотор и речиси сите типови на турбо бензинци од сите производители ми прошле низ раце. Вака лошо димензиониран мотор, менувач и турбо полнач нема никој освен Опел. Форд и Волксваген групација имаат совршени турбо бензинци кои во комбинација со PоwerShift и DSG менувачите секогаш ме оставале без здив.
Подвозјето на Opel Mokka X беше пристојно. Убаво ги пеглаше нерамнините, на отворен пат се однесуваше дисциплинирано како СУВ возило кое што има повисоко тежиште. Тука неможам да најдам никаква забелешка.
Кабината и завршната обработка се просечни. Користени се пиано финиш материјали за да се даде малку ексклузивност во внатрешниот амбиент, на централната конзола имаше убав голем дисплеј даваше малку хајтек ефект. Шалт таблата, вратите се обложени со меки материјали пријатни на допир, средишната конзола околу менувачот е направена од ефтина пластика. Сите врати на возилото се затвораа чудно, мораше да ги треснеш деспотски за да се затворат како што треба. За возило со 16.000 километри поминато ова е неприфатливо.
Во текот на возењето сосема неочекувано се јавуваше предупредувачки звук (титкање) од инструмент таблата кој што не беше проследен со никаква визуелна информација дека нешто не е во ред со возилото. Тоа се случуваше спорадично без никакво претходно дејство или опасност од било што. Во првите моменти помислував дека е некаков звук од мојот мобилен, но до самиот крај не успеав да утврдам што го предизвикуваше тоа.
Потрошувачка. Катастрофално голема.
За да го поткрепам зборот “Катастрофално” со факти ќе наведам дека истите дестинации што ги возев со ова возило ги имам претходно возено и со многу други возила со дизел и турбо бензински мотор. Со сите возила сум поминувал отприлика по 700 километри во просек, и сите ги имам возено во речиси исти услови на експлоатација и истите рути.
Ќе направам мала компарација на тие возила со ова за да добиете впечаток колку е ситуацијата катастрофална:
Ford Fiesta 7.5, 1.0 EcoBoost + Powershift - 5.2 литри/100км
VW Golf 7 1.6 TDI - 5.1 литри/100км
VW Golf 7 GTI - 6.8 литри/100км
VW Golf 7 1.2 TSI - 5.2 литри/100км
Skoda Rapid 1.6 TDI - 5.3 литри/100км
Peugeot 2008 1.6 HDI - 4.9 литри/100км
Ford Focus 1.0 Ecoboost - 5.3 литри/100км
Opel Mokka X 1.4 Turbo - 7.6 литри/100кмМислам дека не е потребно повеќе никаков коментар. Бројките од горе зборат доволно.
Моја лична препорака е да не си ги трошите парите за Opel Mokka воопшто, па макар и да била со дизел мотор ако тоа треба да смени нешто на подобро.
Ќе си земам за право да ја употребам фразата што многу членови на форумов ја кажуваат со доза на сарказам за Опел: полупроизвод.
