Легендарниот Interceptor од култниот филм Лудиот Макс се враќа на сцена за да учествува во уште едно продолжение на фантастиката која своето патешествие го започна пред повеќе од 30 години.
Целата приказна ја започна австралискиот огранок на Ford кој заедно со тамошното издание на магазинот Top Gear подготвија два нови концепти кои се создадени за да не потсетат на купето Falcon XB GT351 Interceptor.
Овој модел го возеше главниот јунак во првото издание на Лудиот Макс кое се појави кон крајот на 70. години од минатиот век и се претвори во еден од најкултните филмови во историјата на подвижните слики.
Прикажаните концепти кои сеуште се наоѓаат на цртачките табли сакаат да ни доловат како Interceptor би личел според денешните правила за дизајн. И двата модели се создадени од група дизајнери на чело со Тод Вилинг.
Со цел да се дојде до најсоодветниот наследник на Interceptor направени се повеќе прототипови, но само два од нив се одбрани за крајната фаза на проектот кој би требало наскоро да заврши.
За конечниот избор ќе одлучат читателите на австралискиот Top Gear. Тие ќе изберат кој од двата предлози е подобар и истиот ќе биде изработен како макета во вистинска големина и прикажан пред пошироката јавност.
Изработката на прототип кој ќе го налседи легендарниот Interceptor не е залудна. Прототипот ќе добие свое место во четвртото издание на филмот Лудиот Макс под наслов Патот на гневот.
Филмот ќе почне да се снима во февруари следната година, а главните ролји ќе ги имаат Чарлиз Терон, Николас Холт и внуката на Елвис Присли, Рајли Кеох.
http://www.vozi.com.mk/panorama/ludiot-maks-doaga-vo-poln-nalet.html