Принципалите секако дека го мониторираат пазарот, но тоа го прават преку своите застапници на локалниот пазар.
Локалниот застапник кажува - во согласност со трендовите на нашиот пазар со нашите модели и конкурентските брендови оваа година, следната година на мојот пазар планирам да продадам 100 примероци од Модел А, 150 примероци од Модел Б, 50 примероци од Модел В и 50 примероци од Модел Г.
Ова е секако поедноставено, не се само бројки, туку поделени и по изведби (вид на погон, вид на мотор, ниво на опрема, итн), периоди од годината... Производителот добива вакви естимации од сите локални/регионални застапници, и си прави своја математика како и кога да ги произведе автомобилите, секако во рамките на своите производствени капацитети. Си прават математики каде земаат во предвид важност и големина на конкретен пазар, големина на конкретниот застапник/дилер, профитни маргини од пазарите, итн.
На крајот, застапникот од принципалот добива „квоти“ на возила. Ништо чудно локалниот застапник да не добие квота иста каква што планирал - на пример, принципалот ќе му каже на локалниот застапник - Следната година ќе добиеш 120 примероци од Модел А, 110 примероци од Модел Б, 70 примероци од Модел В и 40 примероци од Модел Г.
Знам за примери каде локални застапници (не наши) побарале 5000 примероци од тој-и-тој-модел со 17-инчни тркала, и иако производителот не го нуди тој модел со 17-инчни тркала, сепак прави напор да ги испорача тие 5000 примероци од тој-и-тој-модел со 17-инчни тркала. Или знам за пример каде наш локален застапник не добил квота за 50 примероци од конкретен модел, бидејќи друг пазар побарал 5000 примероци од истиот модел - и секако, тој што побарал 5000 примероци е поприоритетен.
Знам за примери тука во Македонија, каде модели иако се популарни и се барани, локалниот дилер нема добиено доволно голема квота од конкретните модели за таа година - и опцијата на локалниот дилер е или да се надева дека некој нешто ќе откаже, па ќе останат „фазла“ возила во самата фабрика, или некој од поголемите дилери има нешто непродадено на лагер од конкретниот модел, што може да биде интересно за нашиот пазар.
