Новите предлог измени на Законот за јавни собири го ограничуваат правото на протест
Измените подразбираат ограничување на правото на протест во неколку сегменти. Имено, новите предлог измени предвидуваат зголемување на потребната бројка на присутни од 20 на 50 граѓани.
Исто така се воведува и дополнителна регулатива според која Јавен собир не може да се одржува:
на други места од витално значење за непречено одвивање на сообраќајот (тунели, премини на пат преку железничка пруга, мостови, надвозници, подвозници, гранични премини, пристап до гранични премини и крстосници);
во седиштата на органите на државната власт и просторот околу нив, како и резиденцијалните и репрезентативните објекти и околниот простор што им припаѓа на органите на државната власт на Република Северна Македонија;
во седиштата на странски дипломатско-конзуларни преставништва и нивни резиденции и
во објекти и простори кои се од посебно значење и интерес за безбедноста на Република Северна Македонија.
Се ограничува и времето на одржување на јавните собири – од 6 часот наутро до 23 часот навечер.
Во претходниот пречистен текст Закон за јавни собири истиот Член 2-а гласи:
Јавен собир заради мирно изразување на мислење или протест може да се одржува на секое место кое е соодветно за таа намена, освен:
до здравствени установи, на начин кој го оневозможува пристапот на возила на брза помош и го нарушува мирот на болните,
до детски градинки и училишта додека децата престојуваат во нив и
на автопатишта и магистрални патишта, на начин со кој се загрозува патниот сообраќај
Новите предлог измени се косат и со членот 21 од Уставот на Република Северна Македонија кој гласи:
Граѓаните имаат право мирно да се собираат и да изразуваат јавен протест без претходно пријавување и без посебна дозвола. Користењето на ова право може да биде ограничено само во услови на воена и вонредна состојба.
М. Ивановска
https://civilmedia.mk/novite-predlog-izmeni-na-zakonot-za-javni-sobiri-go-ogranichuvaat-pravoto-na-protest/
