Уште на старт да се извинам поради слабиот квалитет на фотографиите, арно ама батериите на блицот ми откажаа љубов, практично после 2-3 штракања, па морав да барам алтернативни начини
Очигледно дека се работи за новата серија 1 на БМВ, претставена во две варијанти: Урбан и Спорт.
За чудо, во живо не изгледа толку лошо како на официјалните фотографии, арно ама, тешко дека ќе може да освои некои награди за убавина. Повторно ја имаме карактеристичната долга хауба, пред која се наоѓаат несекојдневните светла, чија форма, во комбинација со големите отвори за воздух, несомнено делуваат поларизирачки и чудно. Може слободно да се каже дека делуваат за нијанса вулгарно, па дури и одбивно. Гледано отстрана, се забележува динамичкиот пристап на дизајнерите, па овој пат „Единицата“ изгледа постегнато во однос на претходникот. Неизбежна е аналогијата со спортска обувка, но, подобро да е обувка, отколку стар кауч, пропаднат на средината, како што беше случајот со минатата генерација, поради надолно закривената линија која се протегаше помеѓу двете осовини. На задницата, нема премногу експерименти, дури делува за нијанса здодевно. Задниот ветробран е повторно низок, со што се ограничува видливоста, додека обликот на задните светлосни групи, и распоредот на компонентите во истите, предизвикуваат дискретен поглед кон последната генерација на VW Polo.
Е во внатрешноста веќе, работите се менуваат. Двете насоки кон кои се движел развојот на новата серија 1, се многу позабележливи токму тука. Се разбира дека не’ пречекува онаа специфична прецизност, дефинираност и функционалност карактеристична за сите Баварски модели, и нормално, се подразбира дека чувството на квалитет и префинетост преовладува пред се’ друго. Дури и пред впечатокот дека има недостаток на простор, и на предната, и на задната клупа. Кога сме кај задната клупа, пристапот до, и надвор од истата бара редовно практикување на јога од страна на корисникот, бидејќи отворот на задната врата е низок, поради ниското спуштање на кровот, и тесен поради аголот на „засекување“ на задните врати, кој веројатно е последица од преносот на силата на задните тркала. Но, како и да е, на прв поглед изгледа дека понудата на простор и неговата искористливост, е подобрена во однос на минатиот модел, како во кабината, така и во товарниот простор. Кај линијата „Урбан“ се забележуваат посмирени тонови, понаква комбинација на бои на облогите на седиштата, интересни украсни елементи од лакирана пластика, кои ги забележуваме на отворите за вентилација, и на вратите. Кај линијата „Спорт“ пак, верувале или не, преовладува токму спортската и динамична нота! Шегата на страна, бидејќи комбинацијата од темни тонови, и црвено осветлување, проследено со црвени декоративни детали, никого не остава рамнодушен.
Пазарната понуда кај нас за овој новитет, содржи 5 елементи, кај кои 2 ги вметнуваме во таборот „Бензинци“, а остатокот го сочинува таборот „Дизели“. Претставниците на „Бензинците“, се фалат со моќност од 136, односно 170 КС, додека кај „Дизелџиите“ моќноста се движи во доменот 116 КС за најслабиот, и 184 КС за најмоќниот. Потрошувачката кај сите претставници се подразбира дека варира од начинот на возење, особено што сега, BMW со притисок на копче, ни нуди избор помеѓу "Sport" и "Eco Pro". Нормално дека во било која ситуација, членовите на таборот „Дизели“ нудат подобра економија и потрошувачка, нема што тука да се полемизира.
Почетната цена која заинтересираниот купувач ќе треба да ја плати, се движи во рангот од 22 700 евра за најдостапниот модел, до 29 900 евра за најмоќниот дизел.
[текст и фотографија: Кристијан Ивановски]
