Honda на саемот за автомобили во Франкфурт ни ја претставува конечната верзија на деветата генерација од Civic.
Новата, деветата генерација на Honda Civic на пазарите низ светот треба да се најде за неколку недели и носи големи подобрувања во однос на претходната генерација. Главна цел при конструирањето на новиот модел беше да се поправат сите недостатоци на претходниот модел без при тоа да се направат некои радикални промени.
Ова најдобро може да се види од надворешниот изглед кој на барање на клиентите остана со скоро непроменета форма, а видливи се промените во дизајнот кој сега е малку 'попитом', а во исто време ја задржува уникатна форма од претходникот. При дизајнирањето големо внимание е посветено на аеродинамиката која сега со 0.27 коефицинет на отпор е најдобрата во класата, што позитивно ќе се одрази на комфорот (тишината), на перформансите и на потрошувачката. Официјалните димензии Honda не ги обелоденува но се претпоставува дека ќе бидат скоро непроменти во однос на претходникот, бидејќи и со овие компактни димензии Honda Civic нуди најмногу простор во внатрешноста, како и најголем багажен простор, кој со 477 литри е врв во компактната класа. На барање на клиентите квалитетот на матреалите во внатрешноста е доста подобрен и сега е на ниво со најдобрите од класата, а за изработката никогаш немало примедби и секогаш била меѓу најдобрите во класата.
За основа е искористена истата платформа која беше омилена помеѓу подинамичните возачи поради спортската поставеност, а беше на критика од пофамилијарните возачи поради тврдата поставеност. Сето ова е земено во предвид и сега според луѓето од Honda новиот Civic ги задржа динамичните квалитети, а во исто време како резултат на интензивното тестирање комфорот е кренат на највисоко ниво во класата, проследено со најтивката внатрешност во компактната класа. За погонот во почетниот период ќе бидат задолжени проверените агрегати кои се целосно модифицирани и сега моќниот 2.2 i-DTEC дизел агрегат од Accord ќе има импресивна потрошувачка од само 4.2 литри нафта на 100 км., податок што е надвор од реалноста за 150 КС моќен мотор од 2.2 литри зафатнина, а емисијата на штетни гасови е задржана на 110 g/km. Бензинските агрегати исто така нудат импресивни бројки за потрошувачката, 1.8 i-VTEC моторот од 142 КС троши само 5.8 литри на 100 км., а помалиот 1.4 i-VTEC само 5.4 литри бензин на 100 км. Во текот на наредната година се очекува и новиот суперекономичен дизел агрегат од 1.6 литри и 120 КС. Сите мотори доаѓаат со start-stop систем кој може да се комбинира и со автоматски менувач. Во понатамошниот период исто така се очекуваат и неколку хибридни и електрични варијанти на Honda Civic, погони познати од другите модели на Honda. Исто така Honda во 2012 година се очекува да го понуди Civic во лутата Type R верзија.
Цените на новиот модел и покрај многуте подобрувања, како и поголемата опрема треба да останат на исто ниво со претходниот модел. Продажните резулатати на новата Honda Civic треба да се подобрат, но не очекувајте Civic да биде на врвот на најпродавани возила во компактната класа, Civic пред се е наменет за луѓе што сакаат исклучително квалитетен и уникатен автомобил, кој се издвојува од сивилото во компактната класа.