Да споделам што се случуваше изминатиов период, бидејќи не бев активен поради обврски, плус штотуку се вратив од летен одмор.
Со цел да се надмине проблемот со „limp mode“, беа заменети неколку компоненти:
• Нов Bosch МАФ сензор (GM# 55562426, 6.000 ден.)
• Нов сензор за диференцијален притисок (GM# 55566186, 3.000 ден.)
• Ново црево за интеркулер (GM# 23163578, 7.000 ден.)
По проверката со неколку различни дијагностички уреди, кои покажуваа исти грешки, прво помислив дека проблемот е во сензорите. Го заменив МАФ сензорот, а потоа и сензорот за диференцијален притисок, но тоа не го реши проблемот.
Понатаму, по дополнително истражување, дознав дека има повеќе сценарија кои можат да го предизвикаат овој проблем кај Инсигниите. Еден од предлозите беше да се провери цревото кај интеркулерот. Иако визуелно не можев да најдам пукнатина, при стискање на гаста открив дека цревото пропушта воздух. Потоа го заменив тоа црево. Перформансите на колата се подобрија, но проблемот сè уште не беше целосно решен. Исто така, ги проверив и другите црева зад моторот, но тие беа во добра состојба и не пропуштаа воздух.
На крајот, откако проверив и други можни причини кои се покажаа во ред, последна опција остана чистењето на ДПФ.
Автомобилот беше однесен во Центар за декарбонизација на мотор каде што чистат ДПФ за овластени сервиси како Автомакедонија и други. Тоа ме чинеше 9.000 денари.
Интересното е што на денот кога требаше да се однесе автомобилот на чистење (јас бев на одмор во Крф, па никој не го возел автомобилот во тој период), татко ми ја пробал колата пред да се однесе и таа почнала да влече како луда. Кога ми го кажа ова, не дека не ми падна мало двоумење дали треба да се однесе или не, ама сепак разумот преовлада и Инсигниата си го доби потребниот третман и беше исчистена соодветно.
Сè на сè, не жалам за вложените пари или нешто, мене само ми фалеше Инсигниичето периодов и среќен сум што повторно влече како што треба. Се надевам дека нема да има изненадувања во блиска иднина.
Во меѓувреме, од Лидл кај јужниот сосед купив голема церада за седан за околу 15-20 евра, пишува дека е отпорна на временски услови и водоотпорна (+50°C | -30°C), со 3-годишна гаранција
.
Исто така, купив нова четка за чистење бандажи со различна форма од таа што веќе ја имам, четка за прозорци, „slime“ за тешко достапни агли (никогаш не сум користел вакво нешто, па решив да пробам), а онлајн нарачав и нови четки за detailing во различни големини, за внатрешно и надворешно чистење. Се надевам дека ќе пристигнат што поскоро.
Last but not least, купено е и ново антифриз од 3л.
