СООБРАЌАЕН НЕМОРАЛ НА УЛИЦИТЕ ВО ГЛАВНИОТ ГРАДВозење „удри и бегај“ низ СкопјеПреминував улица на зелено светло кога во момчето на велосипед, кое беше пред мене, удри автомобил. Го забележав „ситроенот“ дека беше залетан, но мислев дека ќе запре на црвено. Велосипедистот не беше многу повреден, но возачот на „ситроенот“ само сврти на свијокот и си замина како ништо да не се случило. Вака раскажува Драган Н. од Тетово, кој бил очевидец на сообраќајката што се случила на булеварот Партизански одреди во скопската населба Kарпош. Ваквите слики станаа секојдневие на скопските улици, на кои од година на година има с` повеќе возачи на автомобили кои на разни начини ја загрозуваат безбедноста на другите учесници во сообраќајот, а остануваат неказнети и непознати за полицијата. Според експертите, причина за ваквата состојба е стравот од казна, но е и одраз на целокупната состојба во општеството.
Kамерите ловат прекршоциСпоред статистиката на СВР Скопје, во изминативе пет години се случиле
8.660 кривични дела против безбедноста во сообраќајот, од кои 1.059 биле извршени од непознат сторител. Полицијата успеала да открие само 151 од нив. Од вкупниот број кривични дела 720 биле за неукажување помош на лице повредено во сообраќајна незгода. Од МВР велат дека безбедноста во сообраќајот, како и откривањето на несовесните возачи значително ќе се зголеми со камерите поставени на сообраќајниците низ Скопје.
- Засега граѓаните добиваат само опомени за направените сообраќајни прекршоци. Само за еден месец камерите регистрирале над 150 прекршоци, но и во наредниот период ќе продолжиме превентивно со предупредување, а не со казнување - велат од МВР.
Според професорот по етика, Kирил Темков, состојбата во сообраќајот не е ништо друго, туку одраз на сликата на целото општеството и на неговата организација.
- Некултура е да не го измиеш автомобилот или да го паркираш пред влезот на туѓа гаража. Непочитувањето на законите и возењето 120 километри на час низ град и неукажувањето помош на повреден во сообраќајка е неморал - вели Темков.
Професорот смета дека граѓаните ја забораваат основната норма на етиката на сообраќајот „мисли на себе и на другите“, па најчесто мислат само на себе, односно на задоволувањето на чувството дека возат брз и нов автомобил.
- Луѓето не се свесни дека треба да се контролираат и да водат сметка за другите, а токму примерот на другите најчесто го следат. Kога ќе видат дека на некој му се простуваат прекршоците зашто има врски во полицијата или судовите, тогаш и тие мислат „ако може тој, можам и јас“- вели професорот.
Повеќе казни за примерСтравот од казна е најчеста причина поради која граѓаните се решаваат по направен сообраќаен прекршок да избегаат и да не ја преземат одговорноста, смета психолог-психотерапевтот Мирјана Јовановска-Стојановска.
- Лажната сигурност дека никој ништо не им може поради нивниот статус или дека поради добрите врски некој ќе им помогне да се забошоти делото, се причини поради кои граѓаните би избегале од местото на сообраќајната незгода.
Но, ова не се толку чести причини. Стравот од казната сепак е доминантен во вакви случаи. Всушност, ваквите ситуации се резултат на целокупниот притисок кој произлегува од начинот на живеење, од настојувањата на поединци да пронаоѓаат дупки во законите, од неспроведување на истите, како и од недоволното казнување - вели Стојановска.
Таа смета дека психичкиот момент, односно структурата на една личност одлучува како истата ќе реагира во одредени ситуации.
- Стравот од казната или желбата да се избегне затвор е пресудно да избега лице што е свесно дека погрешило. Тој знае дека, на пример, возел пијан и свесно ја избегнува одговорноста. Меѓутоа, чувството на одговорност не е исто кај сите. Kај некого тоа е силно развиено, па некој самиот ќе се пријави во полиција ако направил прекршок независно што и кај него постои свесност дека ќе биде казнет за тоа што го направил - вели Стојановска.
Професорот Темков смета дека состојбата во сообраќајот уште долго нема да се смени на подобро бидејќи државата не прави доволно за да се спречат и да се казнат неморалните возачи.
- Kај нас на луѓето око не им трепнува и пијани ќе возат автомобили, а на Запад веќе произведуваат автомобили кои нема да стартуваат ако „намирисаат“ алкохол кај возачот. Се намалува и дозволената максимална брзина за возење во град, а кај нас се вози над стотка. Kаков морал бараме од луѓе што зборуваат на мобилен телефон, а во автомобилот возат деца, па уште и без појас? Па тие деца ги гледаат своите родители и утре ќе возат како нив. А утре ќе има погуст сообраќај, повеќе автомобили, кои ќе бидат уште побрзи, па ќе плаќаат казни и, за жал, ќе гинат - смета професорот.
Игор Шегавиќ
Пластичарската улица најсмртоноснаБулеварот Никола Kарев, кој е попознат како пластичарската улица, е најопасната сообраќајница во главниот град, покажува статистиката на СВР Скопје. Во изминативе четири години на булеварот загинале 11 лица, а 243 биле полесно или потешко повредени во 158 сообраќајни несреќи. На булеварот Партизански одреди, кој е најфреквентната сообраќајница во градов, во истиот период загинале 12 лица, а 467 биле повредени, но во 329 сообраќајки.
На другите градски булевари најмногу несреќи се случуваат на булеварот Александар Македонски во Автокоманда каде што за четири години имало 179 сообраќајни несреќи во кои загинале седуммина, а биле повредени 268 лица.
„Првомајска“, пак, е најопасната улица на која во изминативе четири години имало 204 сообраќајни несреќи во кои загинале четворица, а 338 биле повредени. Меѓу поопасните градски сообраќајници е и улицата Ѓорче Петров, на која во истиот период загинале четири лица, а 200 биле повредени во 131 сообраќајка.
http://www.dnevnik.com.mk/?ItemID=613BE1B98080CB4B92D3A8D22A1D4DDB
