Пред една година - можеби и повеќе - на едно карклуб пиво дискутиравме на темата дали моторите од ист произведувач и со иста кубикажа, а различна коњажа, се разликуваат по нешто друго освен тип на турбо, интеркулер, мапа итн, или, можеби, постојат суптилни разлики и во самиот мотор (глава, блок итн...). Повод за муабетот беше ремапирањето/чипувањето, т.е. добивање повеќе коњи со измени во електрониката.
Тогаш ветив дека ќе истражам како стојат стварите кај 1.5 дци, бидејќи го има од 60-и-нешто до сто-и-кусир коња. Ги занемаруваме очигледните разлики како присуство-отсуство-и-тип на турбо, интеркулер, итн. Не интересира дали „јадрото“ на моторот (глава, блок, клипови, клипњачи и радилица) е истото кај сите или не е.
Кај 1.5 дци не е.
Имено, моторите ДО 100 коња се механички идентични. Но, тие од 100 коња па нагоре се разликуваат во составот на легурите од која се изработени клипњачите и радилицата. Иако по изглед се идентични, имаат поинакви механички својства (по јаки се). Клиповите исто така се од појака легура, но имаат и минимални измени во дизајнот - се работи за милиметарски разлики кои на око може и да не се приметат, но се тука.
На мое изненадување, блокот е и понатаму истиот, иако лично очекував токму блокот да биде со различна смеса од метали и јаглерод и зајакнат. Но, блокот кај реноовиот 1.5 дци е изгледа доволно јак за сто-и-кусур коња каков што си е.
Некои извори тврдат и дека најјаките 1.5 дци мотори имаат и различна брегаста осовина, но околу тоа нема консензус. Некои викаат истата е.
