Скопските улици личеа на мориња од последниот дожд. Не дека тоа е нешто ново, но овој пат беше невозможно возачите да се движат речиси по сите скопски улици без последици и без нервози. Сообраќајот беше бавен, возачите лазеа, само за да ги избегнат големите вирови. Оние со постари возила „не преживеаја“, останаа додека не дојде да ги влече некој близок со подобра кола. Можеа да се видат куп изгаснати возила среде важни артерии во строг центар, 11 Октомври, Мито Хаџи Василев-Јасмин, Димитрие Чуповски, Васил Аџиларски кај ГТЦ. Тоа предизвика уште поголем метеж, свирежи и пцости.
- Саат време ми требаше да излезам од центарот, да стасам од Црвен крст до Карпош. Семафорите се вклучуваа и исклучуваа, возилата стоеја во место. Ако за властите ова е нормално, тогаш секојпат кога ќе има невреме подобро нека прогласат елементарни непогоди, за да не излегуваме од дома - револтирано e Соња Маџарова, жител на Карпош 4.
Но не страдаше само центарот, туку и другите населби. Подвозникот кај булевар Србија во Лисиче беше поплавен во висина од еден метар, а половина час возилата стоеја во место, бидејќи многумина не сакаа да ризикуваат колата да им изгасне од барата. Во Црниче, пак, кај црквата „Света Петка“, вода шикаше од преоптовареност и се слеваше удолу с` до подвозникот. По улицата Водњанска не се возеше од камењата што се истркалале од падините.
Од Град Скопје велат дека проблем било ѓубрето и песокта што ги носел дождот. На неколку места имало дефекти со пумпите, како на пример кај булевар Србија. Додаваат дека ваков дожд, според Управата за хидрометеоролошки работи, не заврнал во Скопје во изминати 30 години.
- Екипите на Град Скопје и на „Водовод и канализација“ во текот на 24 часа беа непрекинато на терен и ги отстрануваа причините за затнување на сливниците. Од „Водовод“ беа ангажирани 15 екипи, изјавија од Одделението за односи со јавноста.
Градските власти упатија обвинувања до општинските власти дека тие се главните виновници што Скопје се поплавува. Според надлежните, не градат атмосферска мрежа на сервисните улици, што доведува водата од собирните улици да се слева кон градските улици и булевари и мрежата да се преоптоварува.
Јорданка Ивановска
http://www.dnevnik.com.mk/default.asp?ItemID=C377AEEDD40C444286A034D999AEA111
